.. shukrakavacham ..

shrIgaNeshAya namaH |
mR^iNAlakundendupayojasuprabhaM pItAmbaraM prasR^itamakShamAlinam |
samastashAstrArthavidhiM mahAntaM dhyAyetkaviM vA~nchhitamarthasiddhaye || 1||

OM shiro me bhArgavaH pAtu bhAlaM pAtu grahAdhipaH |
netre daityaguruH pAtu shrotre me chandanadyutiH || 2||

pAtu me nAsikAM kAvyo vadanaM daityavanditaH |
vachanaM choshanAH pAtu kaNThaM shrIkaNThabhaktimAn || 3||

bhujau tejonidhiH pAtu kukShiM pAtu manovrajaH |
nAbhiM bhR^igusutaH pAtu madhyaM pAtu mahIpriyaH || 4||

kaTiM me pAtu vishvAtmA urU me surapUjitaH |
jAnuM jADyaharaH pAtu ja~Nghe j~nAnavatAM varaH || 5||

gulphau guNanidhiH pAtu pAtu pAdau varAmbaraH |
sarvANya~NgAni me pAtu svarNamAlApariShkR^itaH || 6||

ya idaM kavachaM divyaM paThati shraddhayAnvitaH |
na tasya jAyate pIDA bhArgavasya prasAdataH || 7||

|| iti shrIbrahmANDapurANe shukrakavachaM sampUrNam ||

##
Encoded and Proofread by Ravin Bhalekar ravibhalekar@hotmail.com